ᐋᐱᔥᑯᓐ ᐄᔨᔨᐅᒡ/ᐄᔥᒌᒫᐅᒡ ᐋᐦ ᒥᒫᔪᐦᐄᑯᒡ ᐐᓂᐹᑯᔨᐤ
ᑖᐱᔥᑯᓐ ᐄᔨᔨᐅᒡ ᑭᔮᐦ ᐄᔥᒌᒫᐅᒡ ᐋᐦ ᒥᒫᔪᐦᐄᑯᒡ ᐐᓂᐹᔨᐤ ᐄᔨᔨᐅᔅᒌᐦᒡ ᑭᔮᐦ ᐄᔥᒌᒫᐅᔅᒌᐦᒡ ᓅᓈᕕᒃ
ᐊᓐ ᓂᔅᑯᒧᐎᓐ ᑖᐱᔥᑯᓐ ᐋᐦ ᒥᒫᔪᐦᐄᑯᒡ ᐄᔨᔨᐅᒡ ᑭᔮᐦ ᐄᔥᒌᒫᐅᒡ ᐄᔨᔨᐅᔅᒌᐦᒡ ᑭᔮᐦ ᓅᓈᕕᒃ ᐄᔥᒌᒫᐅᒡ ᓈᔥᑖᑆᐦ ᒌᐦ ᒋᔥᑎᒫᐎᓐ, ᒌᐦ ᐊᔨᒥᐦᐄᑐᓈᓂᐤ ᑭᔮᐦ ᒌᐦ ᒥᓯᓂᐦᐅᓱᓈᓂᐤ ᓂᔅᒋᐲᓯᒽ 2003᙮ ᐊᓐ ᒫᐅᒡ ᑳᐦ ᑭᓂᐙᐱᐦᑎᑭᓂᐎᒡ ᐅᑎᐦ ᓂᔅᑯᒧᐎᓂᐦᒡ ᐋᐅᒄ ᒑ ᒥᔪᓂᓯᑐᐦᑎᒥᐦᐄᐙᒡ ᑭᔮᐦ ᒑ ᒑᔥᑎᓈᑖᔮᔨᐦᑖᑯᐦᒡ ᐊᓐ ᐐᓂᐹᒄ ᑖᐱᔥᑯᓐ ᐋᐦ ᒌᐦ ᒥᒫᔪᐦᐄᐙᒡ ᒑ ᐄᑖᐱᑎᐦᒡ ᑭᔮᐦ ᒑ ᒌᐦ ᐃᐦᑖᓂᐎᒡ, ᐋᑯᑎᐦ ᑳ ᓅᑯᐦᒡ ᐋᐦ ᒥᔪᐐᒑᐱᑎᓰᒥᑐᓈᓂᐎᒡ᙮
ᐊᓐ ᐊᔅᒌ ᑖᐱᔥᑯᓐ ᐋᐦ ᒥᒫᔪᐦᐄᑯᒡ ᐄᔨᔨᐅᒡ ᑭᔮᐦ ᐄᔥᒌᒫᐅᒡ ᐋᑯᑎᐦ ᑳᐦ ᒌᐦᑳᓈᑯᐦᒡ ᒑ ᒥᔪᐐᒑᐱᑎᓰᒥᑐᓈᓂᐎᒡ ᑭᔮᐦ ᑖᐱᔥᑯᓐ ᑎᐹᔨᐦᒋᒑᓯᐅᒡ ᒑ ᐐᒋᐦᐄᑐᒡ ᐄᔨᔨᐅᒡ ᑭᔮᐦ ᐄᔥᒌᒫᐅᒡ᙮ ᐋᑯᑎᐦ ᑳᐦ ᒌᐦᑳᓈᑯᓂᔨᒡ ᑖᐱᔥᑯᓐ ᒑ ᓂᓯᑐᐦᑎᐦᒡ ᑭᔮᐦ ᐱᒥᐱᔨᐦᑖᒡ ᐊᓂᔮᐦ ᑖᐱᔥᑯᓐ ᒫᒫᔪᐦᐄᑯᒡ ᐊᔅᒋᔨᐤ ᑭᔮᐦ ᐐᓂᐹᑯᔨᐤ ᐋᐦ ᓅᑯᓂᔨᒡ ᐅᑎᑖᓰᐎᓂᐙᐤ ᑭᔮᐦ ᒥᔥᑏᐦ ᐋᐦ ᐄᐦᑎᑯᓂᔨᒡ ᐊᓂᑎᐦ ᒑᒀᔨᐤ ᒑ ᒌᐦ ᒥᓈᐦᐅᓈᓂᐎᐎᔨᒡ ᑭᔮᐦ ᐋᐱᑎᓂᔨᒡ᙮
ᐋᑯᑎᐦ ᑎᔮᐦᑭᐦᐄᒑᐱᔨᒡ ᐆ ᓂᔅᑯᒧᐎᓐ ᑖᐱᔥᑯᓐ ᓅᓈᕕᒃ ᐊᔅᒌ ᓂᔅᑯᒧᐎᓐ ᑭᔮᐦ ᐐᓂᐹᑯᐦᒡ ᔮᔮᐤ ᐄᔨᔨᐅᔅᒌᐦᒡ ᓂᔅᑯᒧᐎᓐ᙮ ᐋᑯᑎᐦ ᑳᐦ ᒥᓯᓂᐦᐄᑭᓂᐎᒡ ᒑ ᐋᐱᑎᐦᒡ ᐊᓂᑎᐦ ᓅᓈᕗᑦ ᐊᔅᒌ ᓂᔅᑯᒧᐎᓂᐦᒡ 28 ᑳ ᐄᑎᓯᓈᑖᒡ ᐱᔅᑭᑎᓯᓂᐦᐄᑭᓐ ᑭᔮᐦ ᐊᓂᑎᐦ ᓂᔅᑯᒧᐎᓂᐦᒡ ᐅᐦᒋ ᐊᔅᒌ ᐊᓂᑎᐦ ᐐᓃᐹᑯᐦᒡ ᔮᔮᐤ ᐄᔨᔨᐅᔅᒌᐦᒡ ᓂᔅᑯᒧᐎᓐ 30 ᐱᔅᑭᑎᓯᓂᐦᐄᑭᓂᐦᒡ᙮
ᐊᓂᑎᐦ ᒑ ᒌᐦ ᐃᐦᑐᑎᑭᓂᐎᒡ ᑭᔮᐦ ᒑ ᒌᐦ ᐱᒥᐱᔨᐦᑖᑭᓂᐎᒡ ᐋᑯᑎᐦ ᐋᔑ ᒫᓯᓈᑖᒡ ᐅᑎᐦ ᐋᐦ ᓃᔑᐦᒡ ᓂᔅᑯᒧᐎᓐᐦ ᐄᔥᒌᒫᐅᒡ ᑭᔮᐦ ᐄᔨᔨᐅᒡ ᑳ ᒥᓯᓂᐦᐅᓱᒡ᙮ ᐊᓐ ᐋᐦ ᐋᔨᒧᑖᒡ ᐊᓂᑎᐦ ᐙᐦᒋ ᐐᔓᑖᒡ ᐊᔅᒌ ᑖᐱᔥᑯᓐ ᐋᐦ ᑖᐦᑭᐦᐄᒑᐱᔨᔨᒡ ᐄᔨᔨᐅᒡ ᑭᔮᐦ ᐄᔥᒌᒫᐅᒡ ᐅᑎᔅᒌᐙᐦᒡ, ᐋᑯᑖᐦ ᐋᔑ ᐐᐦᑖᑯᐦᒡ ᐄᔨᔨᐅᒡ ᑭᔮᐦ ᐄᔥᒌᒫᐅᒡ ᐋᐦ ᑎᐲᐙᐅᓰᒡ ᑭᔮᐦ ᒫᒃ ᑖᐱᔥᑯᓐ ᒋᑭ ᒌᐦ ᐐᔓᑎᒧᒡ ᑭᔮᐦ ᒋᑭ ᒌᐦ ᐋᐱᒋᔥᑖᐎᒡ᙮ ᐊᓐ ᐋᔑ ᐎᔮᔨᐦᑖᑯᐦᒡ ᐅᐦᒋ ᐅᑖᐦ ᒑ ᐄᔅᐱᔨᐦᑖᑭᓂᐎᒡ ᒑᒀᓐ ᑖᐱᔥᑯᓐ ᐐᐦ ᒋᔥᑖᔨᐦᑎᑭᓂᐎᐎᔨᐤᐦ ᐅᑭᔅᒋᐦᐅᐎᓂᐙᐤᐦ ᑭᔮᐦ ᐊᓂᔮ ᐋᑖᔨᐦᑎᒥᐦᐄᑯᒡ ᐄᔨᔨᐅᒡ ᑭᔮᐦ ᐄᔥᒌᒫᐅᒡ:
ᐅᑖᐦ ᐄᑖᐦᒑ ᐄᔥᒌᒫᐅᒡ ᐋᐦ ᐄᐦᑖᒡ, ᐐᔨᐙᐤ ᐎᔮᔨᐦᑎᒧᒡ ᒑ ᐄᔅᐱᔨᐦᑖᑭᓂᐎᐎᔨᒡ ᒑᒀᔨᐤ ᐅᑎᐦ᙮ ᐙᔮᔨᐦᑎᐦᒀᐤᐦ ᒑᒀᔨᐤ ᐅᒌ ᒥᔮᒨᐱᔥᑎᐦᒡ ᓅᓈᕕᒃ ᐋᐦ ᐎᔮᔨᐦᑖᑯᓂᔨᒡ ᒑᒀᔨᐤ ᐅᑖᐦ ᐐᓂᐹᑯᐦᒡ ᑭᔮᐦ ᐊᓂᒌ ᓅᓈᕕᒃ ᒦᓐ ᑳᓂᐙᐱᐦᑎᐦᒡ ᒑ ᒌᐦ ᐄᔑ ᑖᐦᑭᐦᐄᒑᐱᔨᔨᒡ ᐋᐱᑎᓰᐎᓂᔨᐤ ᐅᑖᐦ ᐄᑖᐦᒑ ᓅᓈᕕᒃ ᒋᑭ ᒌᐦ ᑖᐦᑭᐦᐄᒑᐱᔨᐤ ᐊᓂᔨᐤ ᐋᔑ ᐎᔮᔨᐦᑎᐦᒡ ᐄᔨᔨᐤᐦ ᐅᑭᔅᒋᐦᐅᓂᐙᔨᐦᒡ ᑭᔮᐦ ᐊᓂᔮ ᒫᑯᔅᑳᑖᔨᐦᑎᒥᐦᐄᑯᔨᒡᐦ, ᐋᑯᑎᐦ ᒑ ᐐᐦ ᒑᔥᑎᓈᐦᐅᒡ ᒑ ᐐᒋᐦᐄᐙᔨᒡᐦ ᑭᔮᐦ ᒑ ᓈᑭᔑᒋᐦᐋᑭᓂᐎᐎᔨᒡᐦ ᐄᔨᔨᐤᐦ ᐄᔅᑯᑎᒃ ᐎᔮᔨᐦᑎᒥᐦᐄᑯᑣᐙ ᒑᒀᔨᐤ᙮
ᑭᔮᐦ ᒫᒃ ᒀᔥᑖᐦ ᐄᑖᐦᒑ, ᐅᑖᐦ ᐄᔨᔨᐤ ᐋᐦ ᐄᐦᑖᒡ, ᐐᔨᐙᐤ ᐄᔨᔨᐅᒡ ᐃᔮᐎᒡ ᒑ ᒌᐦ ᐎᔮᔨᐦᑎᒥᐦᐄᑯᒡ ᒑᒀᔨᐤ᙮ ᐎᔮᔨᐦᑎᐦᒀᐙ ᒑᒀᔨᐤ ᐅᒌ ᒥᔮᒨᐱᔥᑎᐦᒡ ᐋᐦ ᐎᔮᔨᐦᑖᑯᓂᔨᒡ ᒑᒀᔨᐤ ᐅᑖᐦ ᐐᓂᐹᑯᐦᒡ ᔮᔮᐤ ᐄᔨᔨᐅᔅᒌᐦᒡ ᑭᔮᐦ ᐊᓂᒌ ᒦᓐ ᑳᓂᐙᐱᐦᑎᐦᒡ ᒑ ᒌᐦ ᐄᔑ ᑖᐦᑭᐦᐄᒑᐱᔨᔨᒡ ᐋᐱᑎᓰᐎᓂᔨᐤ ᐅᑖᐦ ᐐᓂᐹᑯᐦᒡ ᔮᔮᐤ ᐄᔨᔨᐅᔅᒌᐦᒡ ᐋᑯᑎᐦ ᒑ ᒌᐦ ᑖᐦᑭᐦᐅᑯᔨᒡᐦ ᑭᔮᐦ ᐄᔥᒌᒫᐤᐦ ᐅᑭᔅᒋᐦᐅᓂᐙᔨᐦᒡ ᑭᔮᐦ ᐊᓂᔮ ᒫᑯᔅᑳᑖᔨᐦᑎᒥᐦᐄᑯᔨᒡᐦ, ᔮᔨᑖ ᒋᑭ ᐊᔥᑎᓈᐎᒡ ᒑ ᒌᐦ ᐐᒋᐦᐄᐙᔨᒡᐦ ᑭᔮᐦ ᒑ ᐱᔑᒋᐦᐋᒡ ᐊᓂᔮᐦ ᒥᔮᒨᐱᔨᒡᐦ ᐄᔅᑯᑎᒃ ᐐᐦ ᐎᔮᔨᐦᑎᐦᒀᐙ ᒑᒀᔨᐤ᙮
ᒑ ᒌᐦ ᐄᔑ ᑖᐦᑭᐦᐄᒑᐱᔨᒡ ᐋᐦ ᓈᓂᑑᒋᔅᒑᔨᐦᑖᑯᐦᒡ ᐊᓂᑖᐦ ᑖᐱᔥᑯᓐ ᐄᔨᔨᐤ/ᐄᔥᒌᒫᐅᔅᒌᐦᒡ
ᐊᓂᑎᐦ ᑖᐱᔥᑯᓐᐦ ᐋᐦ ᑖᐦᑭᐦᐅᑯᒡ ᐊᔅᒌᔨᐤ ᐄᔨᔨᐅᒡ/ᐄᔥᒌᒫᐅᒡ, ᑖᐱᔥᑯᓐ ᐃᔮᐎᒡ ᑭᔅᒋᐦᐅᐎᓂᔨᐤ ᒑ ᒌᐦ ᐎᔮᔨᐦᑎᒥᐦᐄᑯᒡ ᒑᒀᔨᐤ ᓈᑎᐙᔨᐦᑖᑯᓂᔨᒡᐦ ᒑ ᐎᔮᔨᐦᑎᒥᐦᐄᐙᔨᒡ᙮ ᑖᐱᔥᑯᓐ ᐄᔨᔨᐅᒡ ᑭᔮᐦ ᐄᔥᒌᒫᐅᒡ ᐋᐦ ᒫᒨᐱᒡ ᒦᓐ ᐋᐦ ᑭᓂᐙᐱᐦᑎᐦᒡ ᒑ ᒌᐦ ᐄᔑ ᑖᐦᑭᐦᐄᒑᐱᔨᔨᒡ ᐋᐱᑎᓰᐎᓂᔨᐤ ᐅᑖᐦ ᐐᓂᐹᑯᐦᒡ ᔮᔮᐤ ᐅᑎᔅᒌᐙᐦᒡ ᒋᑭ ᐐᒋᐦᐄᑐᐎᒡ ᑭᔮᐦ ᑖᐱᑎᐤ ᒋᑭ ᒌᐦ ᐎᔮᔨᐦᑎᒥᐦᐄᑯᐎᒡ᙮ ᓂᔅᑯᒧᐎᓂᐦᒡ ᒥᓯᓈᑖᐤ ᐆ ᔮᔨᑖ ᒑ ᐃᐦᑎᓈᓂᐎᒡ, ᑖᐱᔥᑯᓐ ᐋᐦ ᑭᓂᐙᐱᐦᑎᐦᒡ ᐊᓂᔮ ᐋᐱᑎᓰᐎᓂᔨᐤ ᐙᐦ ᐃᐦᑐᑎᑭᓂᐎᐎᔨᒡ᙮ ᐅᒌ ᓃᔓᔨᒡ ᒥᔮᒨᐱᒡ ᐋᔪᐎᒄ ᐅᑖᐱᑎᓰᐎᓂᐙᐤ ᒑ ᒌᐦ ᓂᒋᔥᑳᑐᒡ ᑭᔮᐦ ᐹᔨᑯᔨᒡ ᒑ ᐄᔑᓈᑯᓂᔨᒡ ᐊᓂᔮ ᐋᔑ ᐎᔮᔨᐦᑎᐦᒡ ᐅᐦᒋ ᐊᓂᔮ ᐋᐱᑎᓰᓂᔨᐤ ᐙᐦ ᐃᐦᑐᑎᑭᓂᐎᐎᔨᒡ᙮ ᐅᑖᐦ ᐃᐦᑐᑎᑭᓂᐎᒑ ᐋᑯᑎᐦ ᒑ ᒑᔥᑎᓈᑖᔮᔨᐦᑖᑯᓂᔨᐅᒡ ᐋᐦ ᐋᐱᑎᓂᔨᒡ ᐊᓂᔮᐦ ᐅᑎᑎᔓᐙᐎᓂᔨᐤᐦ ᐊᓂᒌ ᑳᓂᐙᐱᐦᑎᐦᒡ ᒑ ᐄᔅᐱᔨᔨᒡ ᒑᒀᔨᐤ ᔮᔨᑖ ᑖᐱᔥᑯᓐ ᒑ ᓂᐦᐋᒋᐦᐄᐙᔨᒡ ᑭᔮᐦ ᐃᐦᑐᑎᑭᓂᐎᐎᔨᒡ᙮
“ᑖᐱᔥᑯᓐ ᐋᐦ ᐄᔑ ᐃᔮᒡ ᑭᔅᒋᐦᐅᐎᓂᔨᐤ” ᒑ ᒌᐦ ᐋᐱᒋᔥᑖᒡ ᐋᔪᐎᒄ ᐋᔑ ᓂᑎᐙᔨᐦᑖᑯᓯᒡ ᐊᐙᓂᒌ ᒑ ᒌᐦ ᐐᑎᐱᒥᑐᒡ ᐄᔅᑯᑎᒃ ᐙᐦ ᐎᔮᔨᐦᑎᒥᐦᐄᑯᑣᐤᐦ ᒑᒀᔨᐤ ᑭᔮᐦ ᒫᒃ ᐙᐦ ᐃᐦᑐᑎᐦᒀᐤᐦ ᐅᑖᐱᑎᓰᐎᓂᐙᐤ᙮ ᐋᔪᐎᒄ ᒦᓐ ᐋᔑ ᓂᑎᐙᔨᐦᑖᑯᓯᒡ ᔮᔨᑖ ᑖᐱᔥᑯᓐ ᒑ ᐄᑖᔨᐦᑎᒥᐦᐄᑯᒡ ᐊᓂᔮᐦ ᐙᐦ ᐄᔑ ᐎᔮᔨᐦᑎᐦᒡ ᑭᔮᐦ ᐋᔑ ᐱᑯᓵᔨᒧᒡ ᒑ ᐃᐦᑐᑎᑭᓂᐎᐎᔨᒡ᙮ ᐋᑯᑎᐦ ᒫᓯᓈᑖᒡ ᐊᓂᑎᐦ 7᙮5 ᓂᔅᑯᒧᐎᓂᐦᒡ ᐋᐦ ᐋᔨᒸᐅᐦᐄᐙᒡ ᐄᔨᔨᐅᒡ ᑭᔮᐦ ᐄᔥᒌᒫᐅᒡ ᐋᐦ ᑖᐦᑭᐦᐅᑯᒡ ᐆ ᒑ ᐋᑎ ᐋᔨᒸᐅᐦᐄᐙᒡ:
ᐅᑎᐦ ᑖᐱᔥᑯᓐ ᒑ ᒌᐦ ᐐᔓᐙᒡ, ᐊᓂᓅᓈᕕᒃ ᑭᔮᐦ ᐄᔨᔨᐅᒡ ᐋᐦ ᐃᐦᑎᑯᐦᒡ ᐊᓂᑎᐦ ᒫᐦᒋᒡ ᓂᔅᑯᒧᐎᓂᐦᒡ, ᐅᐦᒋ ᑭᔮᐦ ᐊᓐ ᐊᐙᓰᓯᒡ ᐋᔑ ᓈᓈᑭᒋᐦᐋᑭᓂᐅᐎᒡ, ᐋᐦ ᐎᔮᔨᐦᑖᑯᐦᒡ, ᐊᔅᒌ ᑭᔮᐦ ᓂᐲ ᐋᐦ ᓈᓈᑭᒋᔥᑖᑭᓂᐎᒡ ᑭᔮᐦ ᒑ ᐄᔑ ᑖᐦᑭᐦᐄᒑᐱᔨᒡ ᐋᐱᑎᓰᐎᓐ, ᑖᐱᔥᑯᓐ ᑖᐱᑎᐤ ᑭᑎ ᒫᒥᑐᓈᔨᐦᑖᑯᓯᐎᒡ ᐄᔨᔨᐅᒡ ᑭᔮᐦ ᐄᔥᒌᒫᐅᒡ᙮ ᑖᐱᔥᑯᓐ ᐄᔑᓈᑯᓂᔨᐤ ᐋᔑ ᐐᒋᐦᐄᐙᒡ ᓅᓈᕕᒃ ᐄᔥᒌᒫᐅᒡ ᐄᔨᔨᐅᒡ ᐄᔨᔨᐅᔅᒌᐦᒡ ᑭᔮᐦ ᑖᐱᔥᑯᓐ ᑭᑎ ᐋᐱᑎᓂᔨᐤ ᐅᑎᔨᒧᐎᓂᐙᐤ ᑭᔮᐦ ᐅᑎᑖᔨᐦᑎᒧᐎᓂᐙᐤ ᐋᐦ ᒥᓯᓈᓱᒡ ᑭᔮᐦ ᐋᐦ ᒌᐦ ᐅᔑᐦᐋᑭᓂᐅᐎᒡ ᐅᑎᐦ ᐅᔮᐦ ᒫᐦᒋᒡ ᓂᔅᑯᒧᐎᓐᐦ ᐊᓂᔮ ᐋᔑ ᐎᔮᔨᐦᑎᐦᒡ ᑭᔮᐦ ᐋᔑ ᐱᒥᐱᔨᐦᑖᒡ ᐊᓂᔮ ᒑ ᐃᐦᑐᑎᒥᐙᑯᐱᓈ ᐊᓂᑎᐦ ᑖᐱᔥᑯᓐ ᐋᐦ ᐐᔓᑎᐦᒡ ᐊᔅᒌᔨᐤ᙮ ᐃᐦᑐᑎᒥᐙᑯᐱᓈ
ᐆ ᒫᒃ ᐋᐦ ᐐᒑᐱᑎᓰᒥᑐᓈᓂᐎᒡ ᐋᑯᑎᐦ ᓅᑯᐦᒡ ᓈᔥᒡ ᒑ ᒥᔪᔨᐙᒡ ᐊᓂᑖᐦ ᒑ ᐄᔑ ᐱᒥᐱᔨᐦᑖᑭᓂᐎᒡ ᐅᑎᐦ ᐊᔅᒌᐦᒡ ᑖᐱᔥᑯᓐ ᐋᐦ ᐐᔓᑎᐦᒡ ᐄᔨᔨᐅᒡ ᑭᔮᐦ ᐄᔥᒌᒫᐅᒡ᙮ ᐋᑯᑎᐦ ᓅᑯᓂᔨᒡ ᑖᐱᔥᑯᓐ ᐋᓐ ᓂᑐᐦᑎᐙᑭᓂᐅᐎᒡ ᑭᔮᐦ ᐃᔮᐱᑎᔒᔥᑎᐦᒡ ᐋᐦ ᐎᔮᔨᐦᑖᑯᓂᔨᒡ ᐊᓂᑖᐦ ᒑ ᐄᔅᐱᔨᔨᒡ ᐅᑖᐦ ᐄᔑ ᓃᔥᑖᒥᐦᒡ᙮ ᐆ ᑳ ᐄᔑ ᓂᔅᑯᒧᑐᓈᓂᐎᒡ, ᑖᐱᔥᑯᓐ ᐋᐦ ᒋᔥᑖᔨᒥᑐᒡ, ᐋᐦ ᓂᓯᑐᐦᑖᑐᒡ, ᑭᔮᐦ ᐋᐦ ᐐᐦ ᒥᓈᒋᔥᑖᒡ ᐊᓂᔮ ᐙᐦᒋ ᒥᓈᐦᐅᓈᓂᐎᐎᔨᒡ ᐅᑎᔅᒌᐙᐦᒡ, ᒑ ᒌᐦᑳᔮᐱᐦᑎᑭᓂᐎᐎᔨᒡ ᒥᓯᐦᑖᔅᑭᒥᒡ ᐋᐦ ᐐᒋᐦᐄᑐᒡ ᑭᔮᐦ ᐋᐦ ᐐᒑᐱᑎᓰᒥᑐᒡ᙮
ᐆ ᓅᑯᐦᒡ ᐅᑖᐦ ᒋᓂᐦᐄᐎᓂᐦᒡ ᐄᑖᐦᒑ ᐋᑯᑎᐦ ᐙᐦᑖᑯᓂᔨᒡ ᒑ ᐄᔑ ᐹᔣᔨᐦᑎᐦᒃ ᐊᓂᑖᐦ ᑖᐱᔥᑯᓐ ᐋᐦ ᐐᔓᑎᒥᔨᒡᐦ ᐄᔨᔨᐤᐦ ᑭᔮᐦ ᐄᔥᒌᒫᐤᐦ ᐊᓐ ᐙᐦ ᐃᐦᑐᑎᐦᒃ ᐋᐱᑎᓰᐎᓂᔨᐤ᙮ ᐃᐦᑎᑯᓂᔨᐤ ᐊᓂᔮ ᒑ ᐃᐦᑐᑎᐦᒡ ᐊᓂᒌ ᐄᔨᔨᐅᒡ ᑭᔮᐦ ᐄᔥᒌᒫᐅᒡ ᒥᔮᒨᐱᔥᑎᐦᒡ ᒑ ᒌᐦ ᐄᔑ ᑖᐦᑭᐦᐄᒑᐃᔨᔨᒡ ᐋᐱᑎᓰᐎᓂᔨᐤ ᒦᓐ ᑳᓂᐙᐱᐦᑎᐦᒡ ᐹᐱᐦᑳᓐ ᐋᐦ ᑭᓂᐙᐱᐦᑎᐦᒡ᙮ ᐋᑯᑎᐦ ᐙᐦᒋ ᒋᔥᒋᐱᔨᒡ ᐋᐦ ᐐᒑᐱᑎᓰᒥᑐᓈᓂᐎᒡ ᐋᐦᒸᔮᐦ ᓈᓂᑑᒋᔅᒑᔨᐦᑖᑯᐦᒡ ᒑ ᐄᔑ ᑖᐦᑭᐦᐄᒑᐱᔨᒡ ᐋᐱᑎᓰᐎᓐ, ᐊᓂᒌ ᐄᔨᔨᐅᒡ ᑭᔮᐦ ᐄᔥᒌᒫᐅᒡ ᐋᐦ ᒫᒨᐱᒡ ᐋᐦ ᐎᔮᔨᐦᑎᐦᒡ ᑖᐱᔥᑯᓐ ᒑ ᐄᔑᓈᑯᓂᔨᒡ ᒋᔅᒑᔨᐦᑎᒨᓯᓂᐦᐄᑭᓂᔨᐤ ᐅᐦᒋ ᑳ ᐄᔑ ᐎᔮᔨᐦᑖᑯᓂᔨᒡ᙮
