ᐊᓂᒌ ᒥᔮᒨᐱᒡ
ᓂᔮᔨᔨᐎᒡ ᐊᓂᒌ ᒥᔮᒨᐱᔥᑎᐦᒡ, ᐹᔨᒄ ᓈᑳᓂᐱᔥᑎᐦᒃ᙮ ᓂᔥᑐᐱᐳᓐᐦ ᐅᑎᐦ ᐐᒋᐦᐄᐙᐎᒡ ᐅᔮᐦ ᐋᑎ ᐐᐦᑖᑯᓂᔨᒡ ᐋᐦ ᐋᐱᑎᓂᔨᒡ ᐋᐦ ᐎᔮᔨᐦᑖᑯᓯᒡ:
- ᓃᔓ ᐅᑖᐦ ᐅᐦᒋ ᑳᓈᑖᐦ ᑎᐹᔨᐦᒋᒑᓰᓈᐦᒡ ᐙᒋᒫᐦᑭᐦᑎᒥᔨᒡᐦ ᑎᐹᔨᐦᒋᒑᓯᐤᐦ-ᐄᔨᔨᐤᐦ ᒑ ᒌᐦ ᓂᐦᐄᔥᑳᑐᔨᒡᐦ ᑭᔮᐦ ᐅᑖᐦ ᐊᑎᒫᐲᓯᒽ ᓂᔮᓈᑭᒋᔥᑖᑦ ᐋᑎ ᐃᔨᔅᐱᔨᔨᒡ ᒑᒀᔨᐤ, ᐅᑖᐦ ᐅᐦᒋ ᐐᓂᐹᑰᐦ ᑭᔮᐦ ᓅᐦᒋᒦᐅᐄᔨᔨᐤᐦ ᐋᐦ ᓈᑎᒫᑐᔨᒡᐦ ᐋᐦ ᐅᐦᒋ ᐐᐦᐋᑭᓂᐎᐎᔨᒡᐦ (ᐄᔨᔨᐅᔅᒌᐦᒡ)
- ᐹᔨᒄ ᐅᑖᐦ ᑳᐦᓈᑖᐦ ᑎᐹᔨᐦᒋᒑᓰᓈᐦᒡ ᐅᐦᒋ ᐎᔮᔨᒫᑭᓂᐆ
- ᐹᔨᒄ ᐅᑖᐦ ᑯᐯᒃ ᑎᐹᔨᐦᒋᒑᓰᓈᐦᒡ ᐊᓂᔮᐦ ᐅᒋᒫᐤᐦ ᓂᔮᓈᑭᒋᔥᑖᔨᒡᐦ ᐊᔅᒌᐦᒡ ᐋᐦ ᐅᐦᒋ ᒥᓈᐦᐅᓈᓂᐎᐎᔨᒡ ᒑᒀᔨᐤ ᒑ ᒥᓈᒋᔥᑖᑭᓂᐎᐎᔨᒡ ᐅᑖᐦ ᐅᐦᒋ ᓅᓈᕗᑦ
- ᐊᓐ ᓈᑳᓂᐱᔥᑎᐙᑦ ᐅᑖᐦ ᐅᐦᒋ ᑳᐦᓈᑖᐦ ᑎᐹᔨᐦᒋᒑᓰᓈᐦᒡ ᐅᐦᒋ ᐅᑎᓈᑭᓂᐤ ᐋᐦ ᐊᔨᒥᐦᐋᑭᓂᐎᑦ ᐱᑎᒫ ᓅᓈᕗᑦ ᑎᐹᔨᐦᒋᒑᓯᐤ, ᐋᐦ ᒌᐦ ᐅᐦᒋ ᐐᐦᐋᑭᓂᐎᑦ ᐋᐦ ᒌᐦ ᐅᐦᒋ ᐐᐦᐋᑭᓂᐎᒡ ᐋᐦ ᒫᒨᐱᔥᑎᒥᔨᒡᐦ ᐊᐙᔨᐤᐦ (ᐋᐦ ᐐᐦᐋᑭᓂᐎᑦ ᑭᔮᐦ ᐋᐦ ᐅᑎᓈᑭᓂᐎᑦ ᐊᐙᓐ ᒑ ᓃᑳᓂᐱᔥᑎᐦᒃ, ᒥᔫᓈᑯᓐ ᑭᔨᑆ ᐅᑖᐦ ᐄᔨᔨᐅᔅᒌᐦᒡ ᐋᐦ ᐐᒋᑦ ᐊᐙᓐ ᒑ ᐅᑎᓈᑭᓂᐎᑦ ᑖᐱᑎᐤ ᐋᐦ ᐄᔑ ᐊᔨᑭᔨᒥᐦᑖᒡ ᐅᔮ ᒑ ᒌᐦ ᐊᔥᑎᐱᐙᑯᐱᓈ)
ᓈᑳᓂᐱᔥᑎᐦᒃ
ᐋᐃᓯᒃ ᒫᔅᑏ
ᐄᔨᔨᐤ ᑎᐹᔨᐦᒋᒑᓰᓈᐦᒡ
ᐋᐃᓯᒃ ᒫᔅᑏ
ᐙᐱᒫᑯᔥᑐᐦᒡ ᑯᐯᒃ ᐅᐦᒌᐤ ᐋᐃᓯᒃ᙮ ᓅᐦᒋᒦᐦᒡ ᒌᐦ ᐱᒫᑎᓰᐤ, ᐐᓵᐙ 80 ᑭᓨᒥᑎᕐᔅ ᐙᐱᓅᑖᐦᒡ ᐄᑖᐦᒑ ᐅᐦᒋ ᐙᐱᒫᑯᔥᑐᐦᒡ, ᒫᒀᒡ ᐋᔥᒄ ᐋᐦ ᒌᐦ ᐱᐹᒥᔨᐦᑖᒡ ᐄᔨᔨᐅᒡ ᐱᑯᑎᔅᑭᒥᑳᐦᒡ᙮ ᐋᑯᑎᐦ ᐊᓂᑎᐦ ᐙᐦᒌᑦ ᑳᐦ ᒋᔅᑯᑎᒫᓱᑦ ᐄᔮᒄ ᒦᓐ ᑳ ᐱᐦᑯᐦᑎᒫᓱᑦ ᐹᒋᓕᕐ ᐅᕝ ᐁᑦᔫᑫᐃᔑᓐ ᑳ ᐄᔑᓂᐦᑳᑖᔨᒡ ᒥᓯᓂᐦᐄᑭᓂᔨᐤ᙮ ᑳ ᒌᔑᐦᑖᑦ ᒥᐦᒌᑐᔨᒡ ᒌᐦ ᐋᐱᑎᔒᔥᑎᒻ ᓂᓈᐦᑭᐤ ᒑᒀᔨᐤ ᐅᑎᐦ ᐅᑎᐦᑖᐎᓂᐙᐦᒡ, ᐋᐦ ᑭᓂᐙᐱᐦᑎᐦᒃ ᐋᑎ ᐃᔨᔅᐱᔨᔨᒡ ᐅᑎᐦᑖᐎᓂᐙᐤ ᐊᓂᑖᐦ ᐅᐦᒋ ᐅᒋᒫᐦᑳᓈᐱᑎᓰᐎᓂᐦᒡ, ᒌᐦ ᐅᒋᒫᐦᑳᓂᔑᔒᐤ, ᒌᐦ ᑖᐦᒋᔥᑭᐙᐤ ᐅᒋᒫᐦᑳᓐ, ᑭᔮᐦ ᒌᐦ ᐅᒋᒫᐦᑳᓂᐤ ᒫᒀᒡ 1980 ᑳ ᐄᑎᓯᓈᑖᔨᒡ ᐋᐦ ᐱᐳᓂᔨᒡ᙮ ᐄᔅᑯᑎᒃ ᑳ ᓂᑭᑎᐦᒃ ᐊᓂᔮ ᐋᐦ ᐋᐱᑎᔒᔥᑎᑭᓂᐎᐎᔨᒡ ᒉᐃᒥᔅ ᐯᐃᐦ ᓂᔅᑯᒧᐎᓂᔨᐤ, ᐋᑯᑎᐦ ᒦᓐ ᒋᔅᑯᑎᒫᒑᐎᓂᔨᐤ ᑳ ᐱᒥᐱᔨᐦᑖᑦ ᐙᐱᒫᑯᔥᑐᐦᒡ, ᐋᔅᐱᔨᔨᒡ ᔓᐎᔮᓐᐦ ᒌᐦ ᑭᓂᐙᐱᐦᑎᒻ ᑭᔮᐦ 30 ᐋᐱᑎᓰᓯᐤᐦ ᒌᐦ ᓇᓈᑭᒋᐦᐋᐤ ᐅᐦᒋ ᒋᔅᑯᑎᒫᒑᐎᓂᔨᐤ᙮ ᒌᐦ ᐅᒋᒫᐦᑭᐦᑎᒻ ᐋᐦ ᒫᒨᐱᔨᒡᐦ ᐎᓂᐦᐄᒑᓯᐤᐦ ᐅᑎᐦ ᐄᔨᔨᐅᔅᒌᐦᒡ ᑭᔮᐦ ᒌᐦ ᐐᒋᐦᐄᐙᐤ ᐄᔨᔨᐤ ᑎᐹᔨᐦᒋᒑᓰᓈᐦᒡ ᑭᔮᐦ ᐋᐦ ᑭᒑᔅᒋᒧᐙᑦ ᒌᐦ ᐄᑖᐱᑎᓰᐤ ᐅᐦᒋ ᐋᐦ ᓂᑑᐦᐅᓈᓂᐎᐎᔨᒡ, ᐋᐦ ᓅᑎᒫᓵᓂᐎᐎᔨᒡ ᑭᔮᐦ ᐋᐦ ᐎᓂᐦᐄᒑᓂᐎᐎᔨᒡ ᐋᐦ ᒫᒨᐱᔥᑎᑭᓂᐎᐎᔨᒡ᙮ ᒌᐦ ᑖᐦᒋᔥᑭᐙᐤ ᑳᓃᑳᓂᐱᔥᑎᒥᔨᒡᐦ ᓂᑑᐦᐅᐎᓂᔨᐤ ᐋᐦ ᒫᒨᐱᔥᑎᑭᓂᐎᐎᔨᒡ ᑭᔮᐦ ᒌᐦ ᓃᑳᓃᐱᔥᑎᒻ ᒦᓐ ᐋᐦ ᑭᓂᐙᐱᐦᑎᑭᓂᐎᐎᔨᒡ ᒑ ᒌᐦ ᐄᔑ ᑖᐦᑭᐦᐄᒑᐱᔨᔨᒡ ᐋᐱᑎᓰᐎᓂᔨᐤ ᐅᑖᐦ ᐐᓂᐹᑯᐦᒡ ᔮᔮᐤ ᐄᔨᔨᐅᔅᒌᐦᒡ ᐄᔅᑯᑎᒃ ᑳ ᒋᔥᒋᐱᔨᐦᑖᑭᓂᐎᐎᔨᒡ 20212 ᑳ ᐄᒋᔥᑖᔨᒡ ᐋᐦ ᐱᐳᓂᔨᒡ᙮
ᐋᔥᑎᐱᑦ
ᕕᕃᑦ ᑣᒧᑐᒃ
ᐄᔨᔨᐤ ᑎᐹᔨᐦᒋᒑᓰᓈᐦᒡ
ᕕᕃᑦ ᑣᒧᑐᒃ
ᒀᓐ ᕆᕕᕐ ᐊᑯᑎᐦ ᑳ ᐱᒫᑎᓰᑦ ᕕᕃᑦ ᒫᒀᒡ ᑳ ᓅᒋᐱᔮᓯᐙᓂᐎᐎᔨᒡ ᐋᐦ ᓰᑯᓂᔨᒡ 22 ᑭᐊᓨᒥᑎᕐᔅ ᐊᑎᒫᐲᓯᒽ ᐄᑖᐦᒑ ᐄᓯᒫᓂᐦᒡ 1954 ᑳ ᐄᒋᔥᑖᔨᒡ ᐋᐦ ᐱᐳᓂᔨᒡ᙮ ᐋᔥᒄ ᓂᒥ ᐅᐦᒋ ᐅᓈᐹᒥᔨᐤᐦ ᐅᑳᐐ ᑳ ᐱᒫᑎᓰᑦ, ᕕᕃᑦ ᐅᓵ ᐊᓂᔮᐦ ᑳ ᑭᓂᐙᔨᒥᑯᑦ ᒌᐦ ᐐᒋᒫᐤ ᒫᒀᒡ ᑳ ᐊᐙᔑᔒᐅᐎᑦ ᐊᓂᑖᐦ ᓂᑑᐦᐆᔅᒌᐦᒡ᙮ ᑳ ᒌᔑᐦᑖᑦ ᑳ ᐄᔥᐹᔨᐦᒡ ᒋᔅᑯᑎᒫᒑᐎᓂᔨᐤ 1970, ᓈᐤ ᑎᐦᑐᐱᐳᓐᐦ ᐱᔑᔑᒄ ᐊᓂᑖᐦ ᓂᑑᐦᐆᔅᒌᐦᒡ ᒌᐦ ᐃᐦᑖᐤ, ᒥᒄ ᐋᐦ ᐹᑖᑦ ᒦᒋᒥᔨᐤ ᑭᔮᐦ ᐊᔪᐎᓂᔨᐤ ᒌᐦ ᐄᑐᐦᑖᐤ ᐊᓂᑖᐦ ᐙᔅᑳᐦᐄᑭᓂᐦᒡ ᑭᔮᐦ ᐋᐦ ᐹᒋ ᒧᐙᐱᑦ᙮ ᒫᒀᒡ ᒫᒃ ᐅᔮ ᑳ ᐄᔅᐱᔨᔨᒡ, ᒦᓐ ᑳ ᒋᔅᑯᑎᒫᓱᑦ ᐊᓂᔮ ᐄᔨᔨᐅᐱᒫᑎᓰᐎᓂᔨᐤ ᐊᓂᑖᐦ ᐋᐦ ᐅᐦᑖᒋᐦᐅᓈᓂᐎᐎᔨᒡ ᑭᔮᐦ ᐄᔨᔨᐅᔨᒥᐎᓂᔨᐤ ᒦᓐ ᒥᔥᑎᐤ ᒌᐦ ᒋᔅᑯᑎᒫᓯᐤ ᐋᑳ ᐅᐦᒋ ᒋᔅᒑᔨᐦᑎᐦᒃ ᒫᒀᒡ ᑳ ᒋᔅᑯᑎᒫᓱᑦ ᒋᔅᑯᑎᒫᑑᑭᒥᑯᐦᒡ ᑭᔮᐦ ᒥᔥᑏᐦ ᒌᐦ ᒋᔅᑯᑎᒫᓲ ᐋᐦ ᓂᑑᐦᐅᑦ, ᐋᐦ ᓅᑎᒫᓵᑦ ᑭᔮᐦ ᐋᐦ ᐎᓂᐦᐄᒑᑦ᙮ 1975 ᑳ ᐄᒋᔥᑖᔨᒡ ᐋᐦ ᐱᐳᓂᔨᒡ, ᐋᑯᑎᐦ ᑳ ᓂᐦᐋᔨᐦᑎᐦᒃ ᒑ ᐐᒑᐱᑎᓰᒫᑦ ᐐᓂᐹᑰᐤᐦ ᑭᔮᐦ ᓅᐦᒋᒦᐅᐄᔨᔨᐤᐦ ᓃᔥᑎᒻ ᑳ ᐃᐦᑖᔨᒡᐦ ᐋᐦ ᐋᔨᒦᔥᑎᒧᐙᑦ ᐅᑏᔨᔨᒻᐦ ᐄᓯᒫᓂᐦᒡ ᐅᑖᐦ ᐄᔑ ᑎᐹᔨᐦᒋᒑᓰᓈᐦᒡ᙮ ᐋᑯᑎᐦ ᑳ ᐄᔅᐱᔨᔨᒡ ᒑ ᐊᑐᔅᑭᐙᑦ ᐅᑏᔨᔨᒻᐦ ᓂᓈᐦᑭᐤ ᐋᐦ ᐄᑖᐱᑎᓰᑦ, ᐋᐦ ᑖᐦᒋᔥᑭᐙᑦ ᐅᒋᒫᐦᑳᓐᐦ, ᐋᐦ ᐅᒋᒫᐦᑳᓂᔑᔒᐅᐎᑦ, ᐋᐦ ᓃᑳᓂᔥᑭᐦᒡ ᐋᐱᑎᓰᐎᓂᔨᐤ ᐊᓂᑎᐦ ᐅᑎᐦᑖᐎᓂᐙᐦᒡ, ᓱᑎᕌᒃ ᒌᐦ ᐋᐱᒋᐦᐄᑰ, ᒋᔅᑯᑎᒫᑑᑭᒥᑯᐦᒡ ᐋᐦ ᐄᔅᐱᔨᐦᐋᑦ ᑭᔮᐦ ᐋᐦ ᒌᐙᐱᔨᐦᐋᑦ ᐊᐙᔑᔥᐦ, ᐋᐦ ᓈᓈᑭᒋᐦᐋᑦ ᒋᐳᐦᐅᐙᓯᐤᐦ, ᓂᓈᐦᑭᐤ ᐋᐱᑎᓰᐎᓂᔨᐤ ᐋᐦ ᒫᒨᐱᔨᒡᐦ ᐎᓂᐦᐄᒑᓯᐤᐦ, ᑭᔮᐦ ᐋᐦ ᐋᔥᑎᐱᑦ ᒥᒋᓐ ᐋᐦ ᑭᓂᐙᐱᐦᑎᑭᓂᐎᐎᔨᒡ ᒑ ᐄᔑ ᑖᐦᑭᐦᐄᒑᐱᔨᔨᒡ ᐋᐱᑎᓰᐎᓂᔨᐤ ᐅᑖᐦ ᐐᓂᐹᑯᐦᒡ ᔮᔮᐤ ᐄᔨᔨᐅᔅᒌᐦᒡ ᑭᔮᐦ ᐋᐦ ᓈᓈᑭᒋᐦᑖᑭᓂᐎᐎᔨᒡ ᓂᑑᐦᐅᐎᓂᔨᐤ᙮ ᕕᕃᑦ ᒌᐦ ᐐᒋᒫᐤ ᕕᕌᓐᓯᔅ ᒫᕐᒃ-ᔅᑐᐎᕐᑦ 1976 ᑳ ᐱᐳᓂᔨᒡ᙮ ᓂᔥᑎᔨᐤ ᐅᑯᓯᓯᐙᐤᐦ ᑭᔮᐦ ᐹᔨᑯᔨᐤᐦ ᐅᑖᓂᓯᐙᐤᐦ ᑭᔮᐦ ᐹᔨᑯᔖᑉ ᐅᔑᔑᒥᔅᒋᐙᐤᐦ (ᔖᔥ ᒦᓐ ᑯᑎᒃᐦ ᐐᐱᒡ ᐹᔣᔨᒫᐎᒡ) ᒑ ᓃᔓᔖᐳᔨᒡᐦ᙮
ᑎᔮᐦᒋᔥᑭᐙᑦ
ᐱᕃᓐᑎᓐ ᐅᑣᓂᓪ
ᑳᓃᑳᓂᐱᔥᑎᒥᔨᒡᐦ ᑳᐦᓈᑖᐦ ᑎᐹᔨᐦᒋᒑᓰᓈᐦᒡ
ᐱᕃᓐᑎᓐ ᐅᑣᓂᓪ
ᐱᕃᓐᑎᓐ ᐅᑣᓂᓪ ᐋᑯᑎᐦ ᑳ ᐱᒫᑎᓰᑦ ᑭᔮᐦ ᑳ ᐅᐦᐱᒋᓈᑭᓂᐎᑦ ᒸᓐᑎᕇᔻᓪ, ᒫᔅᑎᕐᔅ ᑏᑭᕇ ᒥᓯᓂᐦᐄᑭᓂᔨᐤ ᒌᐦ ᐱᐦᑯᑎᒫᓲ ᐅᐦᒋ ᑳ ᐹᒋ ᐃᔨᔅᐱᔨᔨᒡ ᑳᐦᓈᑖᐦ᙮ ᓂᔥᑐᒥᑎᓂᐙᐱᐳᓐᐦ ᒌᐦ ᐋᐱᑎᔒᔥᑎᐙᐤ ᑳᐦᓈᑖᐦ ᐃᐹᔨᐦᒋᒑᓯᐤᐦ, ᓃᔥᑎᒻ ᐊᓂᑖᐦ ᐋᐦ ᐅᐦᒋ ᓈᓈᑭᒋᔥᑖᑭᓂᐎᐎᔨᒡ ᐋᐦ ᓅᑎᒫᓵᓂᐎᐎᔨᒡ ᑭᔮᐦ ᐋᐦ ᓈᓈᑭᒋᔥᑖᑭᓂᐎᐎᔨᒡᐦ ᒋᐦᒋᑭᒦᐦ ᑭᔮᐦ ᓃᔥᑎᓂᐅᓂᔮᔪᔖᑉ ᑎᐦᑐᐱᐳᓐᐦ ᐊᓂᑎᐦ ᐋᐦ ᐅᐦᒋ ᓈᓈᑭᒋᔥᑖᑭᓂᐎᐎᔨᒡ ᐊᔅᒌᔨᐤ ᓈᔥᒡ ᐋᐦ ᐐᐦ ᓈᑭᑎᐙᔨᐦᑖᑯᓂᔨᒡ, ᐊᓂᑎᐦ ᑳᐦ ᑭᒑᔅᒋᒫᒑᑦ ᐄᔨᔨᐤᐦ ᒑᒀᔨᐤ ᐋᐦ ᑖᐦᑭᐦᐅᑯᔨᒡᐦ᙮ ᐋᑯᑎᐦ ᑳ ᐴᓈᐱᑎᓰᑦ 2010 ᑳ ᐄᒋᔥᑖᔨᒡ ᐋᐦ ᐱᐳᓂᔨᒡ᙮ ᐋᑯᑎᐦ ᒦᓐ ᑳᐦ ᐊᔥᑎᐱᑦ ᓅᓈᕕᒃ ᐐᓃᐹᑯᔨᐤ ᔮᔮᐤ ᐄᔥᒌᒫᐅᔅᒌᐦᒡ ᒑ ᒌᐦ ᐄᔑ ᑖᐦᑭᐦᐄᒑᐱᔨᔨᒡ ᐋᐦ ᐐᐦ ᒥᓈᒋᔥᑖᑭᓂᐎᐎᔨᒡ ᐊᔅᒌᔨᐤ ᒑ ᒌᐦ ᐄᔑ ᑖᐦᑭᐦᐄᒑᐱᔨᔨᒡ ᐋᐱᑎᓰᐎᓂᔨᐤ 2010 ᐲᐦᐃᒻ 2013, ᑭᔮᐦ ᐋᑯᑎᐦ ᑳᐦ ᐋᔥᑎᐱᑦ 2013 ᐋᐦ ᐱᐳᓂᔨᒡ᙮ ᐅᑖᐦ ᐙᐱᓅᑖᐦᒡ ᐄᑖᐦᒑ ᒸᓐᑎᕇᔻᓪ ᐋᑯᑎᐦ ᐙᒋᑦ᙮ ᐋᑯᑎᐦ ᑳ ᐅᑎᓈᑭᓂᐎᑦ ᐋᐦ ᒫᒨᐱᓈᓂᐎᐎᔨᒡ ᒦᓐ ᐋᐦ ᑭᓂᐙᐱᐦᑎᑭᓂᐎᐎᔨᒡ ᒑ ᐄᔑ ᑖᐦᑭᐦᐄᒑᐱᔨᔨᒡ ᐋᐱᑎᓰᐎᓂᔨᐤ ᒑ ᑖᐦᒋᔥᑭᐙᑦ ᑳᓃᑳᓂᐱᔥᑎᒥᔨᒡᐦ ᐅᑎᐦ 2025 ᐋᐦ ᐱᐳᓃᔨᒡ᙮
ᐋᔥᑎᐱᑦ
ᒫᕐᑭᕆᑦ ᕚᔨᕐᒥᓐ
ᐄᔨᔨᐤ ᑎᐹᔨᐦᒋᒑᓰᓈᐦᒡ
ᒫᕐᑭᕆᑦ ᕚᔨᕐᒥᓐ
ᐋᐅᒄ ᒫᐅᒡ ᒫᔻᔨᐦᑎᒫᓐ ᐋᐦ ᒋᔅᒋᓯᔮᓐ ᐙᔥᑎᐦᑳᓂᐦᒡ ᑳ ᒌ ᐐᒋᔮᐦᒡ ᐋᐦ ᐹᔨᑯᑖᐅᓯᔮᐦᒡ ᑭᔮᐦ ᐋᐦ ᐱᒥᔥᑳᔮᐦᒡ ᐊᓂᑖᐦ ᐐᓂᐹᑯᐦᒡ᙮
ᒋᓵᓰᐲᐦᒡ ᐅᐦᒌᐤ ᒫᕐᑭᕆᑦ ᑭᔮᐦ ᑯᑡᔥᒡ ᐃᐦᑎᔑᔨᐤᐦ ᐅᑎᐙᔑᔒᒥᐙᐤᐦ᙮ ᓂᓯᑐᐦᑎᒻ ᐄᔨᔨᐅᔨᒧᐎᓂᔨᐤ ᑭᔮᐦ ᐋᔪᐎᒄ ᐋᔑ ᐊᔨᒥᑦ ᐊᓂᑖᐦ ᐅᑎᐦᑖᐎᓂᐙᐦᒡ ᐃᔮᐱᑎᓂᔨᒡ ᐄᔨᔨᐅᔨᒥᐎᓂᔨᐤ ᑭᔮᐦ ᓈᔥᑖᑆᐦ ᐊᑎᑎᐤ ᐐᐦ ᒋᔅᒑᔨᐦᑎᒻ ᑭᔮᐦ ᒥᔥᑏᐦ ᐐᒋᐦᐄᑰ ᒋᔖᔨᔨᐤᐦ ᐋᐦ ᐐᒑᐱᑎᓰᒫᑦ ᐋᐦ ᐐᐦᑎᒫᑯᑦ ᑖᓐ ᑳ ᐹᒋ ᐃᔨᔅᐱᔨᔨᒡᐦ ᒋᓵᓰᐲᐅᐄᔨᔨᐤᐦ ᐅᑖᐦ ᐄᔑ ᐅᑖᐦᒡ᙮ ᐊᓅᐦᒡ ᒫᒃ ᐋᔪᐎᒄ ᐋᑖᐱᑎᓰᑦ ᐋᐦ ᑭᒑᔅᒋᒫᒑᑦ ᐊᑎᑎᐤ ᐋᐦ ᐐᐦ ᓈᓂᑑᒋᔅᒑᔨᐦᑖᑯᓂᔨᒡ ᒑᒀᔨᐤ ᐊᓂᔮ ᓈᔥᒡ ᑳᐦ ᒋᔥᑎᒫᐙᔨᐦᑎᒥᔨᒡᐦ ᐄᔨᔨᐅᐱᒫᑎᓰᐎᓂᐦᒡ ᒑ ᒌᐦ ᐊᔥᑎᓂᑭᓂᐎᐎᔨᒡ ᒑᒀᔨᐤ ᐋᐦ ᐱᒦᐦᑭᑭᓂᐎᐎᔨᒡ ᐅᑖᐦ ᒋᓵᓰᐲ ᐄᔨᔨᑭᒥᑯᐦᒡ ᐊᓂᑎᐦ ᑳᓂᐙᔨᐦᑖᑯᓂᔨᒡ ᐋᔮᓂᔅᒑ ᐄᔨᔨᐅᐃᔨᐦᑎᐎᓂᔨᐤ ᒨᔥ ᑳ ᐹᒋᔑᓈᑯᓂᔨᒡ᙮ ᒌᐦ ᐱᐦᑯᐦᑖᐤ ᒥᓯᓂᐦᐄᑭᓂᔨᐤ ᐋᐦ ᒌᐦ ᒋᔅᑯᑎᒫᓱᑦ ᒑ ᒌᐦ ᐄᔑ ᐱᒥᐱᔨᐦᑖᑭᓂᐎᐎᔨᒡ ᐋᐦ ᐐᐦ ᑭᓂᐙᔨᐦᑖᑯᓂᔨᒡ ᐄᔨᔨᐅᐃᔨᐦᑎᐎᓂᔨᐤ ᑭᔮᐦ ᒦᓐ ᑳᐤ ᒑ ᒌᐦ ᐋᐱᑎᓂᔨᒡ ᐄᔨᔨᐅᔨᒧᐎᓂᔨᐤ ᐅᑖᐦ ᐅᐦᒋ ᔫᓂᕕᕐᓯᑏ ᐅᕝ ᕕᒃᑣᕆᔮ ᐊᓂᑖᐦ ᐱᕆᑎᔥ ᑭᓨᒻᐱᔮᐦ᙮ ᒌᐦ ᒌᔑᐦᑖᐤ ᑭᔮᐦ ᐋᐦ ᒋᔅᑯᑎᒫᒑᓂᐎᐎᔨᒡ ᒑ ᐄᔑᓈᑯᓂᔨᒡ ᐅᐦᒋ ᐋᐦ ᐐᐦ ᑭᓂᐙᔨᐦᑖᑯᓂᔨᒡ ᒑᒀᔨᐤ ᐋᑳ ᒑ ᒌᐦ ᐎᓂᐦᑎᓂᔨᒡ ᐅᐦᒋ ᑳ ᐹᒋ ᐃᔅᐱᔨᔨᒡ ᐅᑖᐦ ᐄᔑ ᐅᑖᐦᒡ ᑭᔮᐦ ᒌᐦ ᒋᔅᑯᑎᒫᓯᐤ ᐋᐦ ᓈᓂᑑᒋᔅᒑᔨᐦᑖᑯᓂᔨᒡ ᐊᑎᑎᐤ ᒑ ᒌᐦ ᒋᔅᒑᔨᐦᑖᑯᓂᔨᒡ ᑭᔮᐦ ᓈᐅᔥ ᐋᐦ ᐐᐦ ᑭᓂᐙᔨᐦᑖᑯᓂᔨᒡ ᑳ ᐹᒋ ᐃᔨᔅᐱᔨᔨᒡ ᒑᒀᔨᐤ ᐅᑖᐦ ᑳᓀᐃᑎᔨᓐ ᒥᔪᓯᔨᒻ ᐅᕝ ᐦᐃᔅᑎᕇ ᐊᓂᑖᐦ ᑳᑎᓂᐤ, ᑯᐯᒃ᙮ ᒫᒀᒡ ᒫᒃ ᑳ ᐱᒥᐱᔨᔨᒡ ᐋᐦ ᐋᐱᑎᓰᑦ, ᒥᐦᒑᔨᒡ ᒌᐦ ᐄᔑᓈᑯᓃᔨᐤ ᒑᒀᔨᐤ ᐋᐦ ᐋᐱᑎᔒᔥᑎᐦᒃ ᐋᐦ ᐋᑐᔅᑭᐙᑦ ᐅᑏᔨᔨᒻᐦ, ᒋᔅᑯᑎᒫᒑᐎᓂᐦᒡ, ᒥᔪᐱᒫᑎᓰᐎᓂᐦᒡ, ᔓᐎᔮᓐᐦ ᐋᐦ ᐱᒥᐱᔨᐦᐋᑭᓂᐎᐎᔨᒡᐦ ᑭᔮᐦ ᐋᔅᐱᔨᐦᑖᑭᓂᐎᐎᔨᒡ ᒥᓯᓂᐦᐄᒑᐅᑭᒥᑯᔨᐤ, ᐋᐦ ᒫᑎᐙᓂᐎᐎᔨᒡ ᑭᔮᐦ ᐄᔨᔨᐅᐃᔨᐦᑎᐎᓂᔨᐤ ᒑ ᐎᓂᐦᑎᓂᔨᒡ ᑭᔮᐦ ᒑ ᑭᓂᐙᔨᐦᑖᑯᓂᔨᒡ᙮ ᑳ ᐄᔥᐱᔑ ᐴᓃᑦ ᐋᐦ ᐋᐱᑎᓰᑦ, ᓈᔥᑖᑆᐦ ᒥᔻᔨᐦᑎᒻ ᓂᑑᐦᐅᔅᒌᐦᒡ ᐋᐦ ᐄᑖᑦ, ᐊᓂᑖᐦ ᒨᔥ ᑳ ᐹᒋ ᐃᔨᐦᑖᔨᒡᐦ ᐄᔨᔨᐤᐦ, ᐋᐦ ᐹᔨᑯᑖᐅᓰᒡ ᐊᓂᑖᐦ ᐋᐦ ᐄᐦᑖᒡ᙮
ᐋᔥᑎᐱᑦ
ᓄᐋ ᒧᓱᓰ
ᓅᓈᕗᑦ ᑎᐹᔨᐦᒋᒑᓰᓈᐦᒡ
ᓄᐋ ᒧᓱᓰ
ᓄᐋ ᒧᓱᓰ 44 ᑎᐦᑐᐳᓍᓯᐤ ᐅᑖᐦ ᐹᓂᒃᓂᕐᑕᓐᒃ ᓈᔥᒡ ᐋᐦ ᒥᔻᔑᔨᒡ ᐋᑯᑖᐦ ᐙᒋᑦ ᓅᓈᕗᑦ, ᐅᑖᐦ ᐋᕐᒃᑎᒃ ᐱᑯᑎᔅᑭᒥᑳᐦᒡ ᑭᔮᐦ ᓂᐲᔨᐤ ᐋᐦ ᑎᐦᒋᑭᒥᔨᒡ ᔮᔨᑖ ᑯᐃᔅᒄ ᐋᐦ ᓈᓈᑭᒋᔥᑖᑭᓂᐎᐎᔨᒡ ᑭᔮᐦ ᐃᔮᒀᒥᓰᓈᓂᐆ ᒑ ᒌᐦ ᐃᔮᔨᒥᔨᐦᑎᓈᓂᐎᒡ᙮ ᓈᔥᑖᑆᐦ ᒥᔻᔨᐦᑎᒻ ᓄᐋ ᐋᐦ ᐴᓯᑦ ᑭᔮᐦ ᓂᐲᐦᒡ ᒥᔻᔨᐦᑎᒻ ᐋᐦ ᐱᐹᒥᔨᐦᑖᑦ ᐅᑖᐦ ᐋᐦ ᒧᔓᐙᔨᒡ ᑭᔮᐦ ᐋᐦ ᐋᑎ ᐅᐙᔖᔨᒡ᙮ ᓄᐋ ᒫᒀᒡ ᓅᒻ ᐄᑖᐱᑎᓰᐤ ᐋᐦ ᐅᒋᒫᐦᑭᐦᑎᐦᒃ ᓈᔥᒡ ᐋᐦ ᓯᑭᔅᒑᔨᐦᑖᑯᓂᔨᒡ ᒑ ᒌᐦ ᒫᒨᐐᓈᓂᐎᐎᔨᒡ ᐙᔅᑳᐦᐄᑭᓂᔨᐤ ᓵᐄᓕᕕᒃ ᑳ ᐄᔑᓂᐦᑳᑖᔨᒡ᙮ ᒌᐦ ᐐᑎᐱᒫᐤ ᓂᑑᐦᐆᓲᐦ ᑭᔮᐦ ᐎᓂᐦᐄᒑᓯᐤᐦ ᐋᐦ ᒫᒨᐱᔨᒡᐦ 2011 ᐲᐦᐃᒻ 2017 ᑭᔮᐦ ᐋᐦ ᐋᐱᔥᑎᑭᓂᐎᐎᔨᒡ ᐋᐦ ᓅᑎᒫᓵᓂᐎᐎᔨᒡ ᐅᑖᐦ ᐹᕕᓐ 2015 ᐲᐦᐃᒻ 2017᙮
ᒥᓯᓂᐦᐄᒑᐅᑭᒥᑯᐦᒡ ᐃᔮᐱᑎᓰᒡ
.
.
.
ᒥᓯᓂᐦᐄᒑᐅᑭᒥᑯᐦᒡ ᐋᐱᑎᓰᓯᐤ
ᐱᕆᓯᓛ ᐌᔅᓖ
ᐋᑯᑎᐦ ᑳᐦ ᒋᔅᑖᐱᑎᓰᑦ ᐱᕆᓯᓛ ᐅᑎᐦ ᒥᓯᓂᐦᐄᒑᐅᑭᒥᑯᐦᒡ 2016 ᑳ ᐄᒋᔥᑖᔨᒡ ᐋᐦ ᐱᐳᓂᔨᒡ᙮ ᓂᔥᑐ ᐅᒋᒫᐤᐦ ᐐᒋᐦᐋᐤᐦ, ᑭᔮᐦ ᒥᔥᑏᐦ ᐐᒋᐦᐄᐙᐤ ᐋᐦ ᐋᐱᑎᔒᔥᑎᐦᒃ ᐋᔅᐱᔨᐦᑖᑭᓂᐎᐎᔨᒡ ᓂᓈᐦᑭᐤ ᒑᒀᔨᐤ᙮ ᐋᐦᒸᔮᐦ ᐅᔮ ᐄᔑ ᐋᐱᒋᐦᐋᑭᓂᐎᑦ, ᒥᐦᒑᑐᐱᐳᓐᐦ ᑭᔮᐦ ᒥᔥᑏᐦ ᒌᐦ ᒋᔅᒑᔨᐦᑎᒻ ᑭᔮᐦ ᐃᔨᑭᔨᒥᐦᑖᐤ ᔓᐎᔮᓐᐦ ᐋᔅᐱᔨᐦᐋᑭᓂᐎᐎᔨᒡᐦ ᑭᔮᐦ ᒥᓯᓂᐦᐄᒑᐅᑭᒥᑯᔨᐤ ᐋᔑ ᐋᐱᑎᔒᔥᑎᑭᓂᐎᐎᔨᒡ᙮ ᒫᒀᒡ ᐋᑳ ᐋᐱᑎᓰᑦ, ᒥᔻᔨᐦᑎᒻ ᐋᐦ ᐹᔨᑯᑖᓰᒡ ᐊᓂᑖᐦ ᐄᒑ ᐅᑎᐦᐋᐎᓂᐙᐦᒡ ᐋᐦ ᐄᐦᑖᒡ᙮
ᓈᑳᓂᔥᑭᐦᒃ (ᐱᔥᑎᑖᐤ ᐋᐦ ᐅᔥᑯᓐ ᓂᔮᐦ ᓄᐯᐦᑖᐳ 2025)
ᐯᐃᓕᓐ ᒍᐋ-ᐆᓐ ᕆᓐᕕᕃᑦ,
ᓃᔥᑎᒻ ᑳ ᐹᒋ ᐋᐱᑎᓰᑦ ᐯᐃᓕᓐ ᐅᑖᐦ ᐋᐦ ᒫᒨᐱᓈᓂᐎᐎᔨᒡ ᐋᔪᐎᒄ ᑳᐦ ᑭᓂᐙᐱᐦᑎᐦᒃ ᐊᔅᒌᔨᐤ ᐋᐦ ᐐᐦ ᒥᓈᒋᔥᑖᑭᓂᐎᐎᔨᒡ 2018 ᑳ ᐄᒋᔥᑖᔨᒡ ᐋᐦ ᐱᐳᓂᔨᒡ, ᔖᔥ ᒫᒃ 6 ᑎᐦᑐᐱᐳᓐᐦ ᐅᒋᒫᐤ ᐅᑖᐦ ᒥᓯᓂᐦᐄᒑᐅᑭᒥᑯᐦᒡ᙮ ᒫᔅᑎᕐᔅ ᑏᑭᕇ ᐃᔮᐤ ᐋᔑ ᑖᐦᑭᐦᐅᑯᔨᒡᐦ ᐄᔨᔨᐤ ᐋᐱᑎᓰᐎᓂᔨᐤ ᐅᑖᐦ ᐅᐦᒋ ᔫᓂᕕᕐᓯᑏ ᔾᕝ ᐅᑖᑯ, ᓂᔫ ᓰᓕᓐ, ᐊᓂᑎᐦ ᓈᔥᒡ ᑳᓂᐙᐱᐦᑎᑭᓂᐎᐎᔨᒡ ᐋᔑ ᑖᐦᑭᐦᐅᑯᒡ ᐋᐱᑎᓰᐎᓂᔨᐤ ᐊᐙᓂᒌ ᐅᑖᐦ ᐅᑎᐦᑖᐎᓂᐙᐦᒡ ᐋᐦ ᓈᓂᑑᒋᔅᒑᔨᐦᑖᑯᓂᔨᒡ᙮